គន្លឹះសម្រាប់ MC បង្ការការភ្លេចឬហៅច្រឡំលេខរៀងឈ្មោះ ក្នុងពិធីប្រគល់មេដាយ

នេះជាបទពិសោធ និងវិធីសាស្ត្រផ្ទាល់ខ្លួន ដែលធ្លាប់ធ្វើជា MC ក្នុងពិធីប្រគល់មេដាយជូនអ្នកធ្វើការ ដែលមានចំនួនលើសពីមួយរយនាក់។

ភាពទូទៅ

– MC ទទួលបានក្រដាសឈ្មោះអ្នកត្រូវទទួលមេដាយ នៅថ្ងៃកម្មវិធីតែម្តង។

– ក្រដាសឈ្មោះអ្នកទទួលមេដាយត្រូវបានព្រីនលើក្រដាស A4, បែបportrait។

– ក្រដាសឈ្មោះអ្នកទទួលមេដាយមាន ២ បែប។

របៀបពិនិត្យ និងកែសម្រួលលេខរៀងក្នុងក្រដាសឈ្មោះ

– បើបានក្រដាសឈ្មោះបែបទីមួយ នោះមិនបាច់កែសម្រួលអ្វីឡើយ។

– បើបានក្រដាសឈ្មោះបែបទី២ នោះត្រូវដាក់លេខរៀងដោយខ្លួនឯងជាថ្មី គឺដាក់លេខរៀងបន្តគ្នាដូចក្រដាសឈ្មោះបែបទីមួយ។

របៀបគ្រប់គ្រងក្រដាសឈ្មោះ និងការហៅឈ្មោះនៅក្នុងកម្មវិធី

– ជាធម្មតា MC កាន់ក្រដាសនៅដៃមួយ ដៃមួយទៀតកាន់មេក្រូ។

– តាមរបៀបរបប, MC មិនអាចបត់ក្រដាសដែលកាន់នៅនឹងដៃឡើយ។

– ទោះមានប៊ិចក៏គ្មានពេលគូសចំណាំលេខរៀងឈ្មោះដែរ ព្រោះឈ្មោះមួយៗដែលត្រូវហៅឲ្យឡើងវេទិកា មានគម្លាតពីគ្នាត្រឹមពី ១ ទៅ ២ វិនាទីប៉ុណ្ណោះ។

វិធីសាស្ត្រ

– កាត់ក្រចកមេដៃឲ្យចេញជារាងស្រួច។

– ពេលកាន់ក្រដាសគឺតម្រង់ចុងក្រចកទៅរកលេខរៀង។

– ចុងក្រចកតម្រង់ទៅរកលេខរៀងមួយណា ត្រូវហៅឈ្មោះហ្នឹង៕

គំរូ Voice Over វីដេអូគន្លឹះសម្រាប់ MC បង្ការការភ្លេចឬការវង្វេងហៅឈ្មោះ ក្នុងពិធីប្រគល់មេដាយ

តទៅនេះជាគន្លឹះសម្រាប់ MC ក្នុងការបង្ការការភ្លេចឬការវង្វេងឈ្មោះក្នុងពិធីប្រគល់មេដាយ។

ត្រូវចាប់ផ្តើមពីក្រដាសឈ្មោះមុនសិន។​ ជាទូទៅ MC មិនបានទទួលក្រដាសឈ្មោះអ្នកត្រូវទទួលមេដាយមុនថ្ងៃឡើយ។ ដល់ថ្ងៃកម្មវិធី ទើបគេយកមកឲ្យ។

ទាក់ទងនឹងក្រដាសឈ្មោះអ្នកទទួលមេដាយ ជាធម្មតាមានពីរបែប។ បែបទីមួយគឺគេដាក់លេខរៀងបន្តគ្នាតាំងពីដើមដល់ចប់។ បែបទីពីរ គឺគេបែងចែកជាក្រុម ហើយលេខរៀងដាក់បន្តគ្នាតែក្នុងក្រុម, ដល់ក្រុមបន្ទាប់ គេផ្តើមពីលេខ ១ ឡើងវិញ។

បើសិនជាបានក្រដាសឈ្មោះបែបទីមួយ នោះមិនបាច់កែសម្រួលអ្វីឡើយ។ បើបានបែបទីពីរ នោះ MC ត្រូវដាក់លេខរៀងដោយខ្លួនឯងជាថ្មី ដោយដាក់លេខរៀងបន្តគ្នាតែម្តង តាំងពីឈ្មោះដំបូងដល់ឈ្មោះចុងបញ្ចប់។

ចូលមកដល់វគ្គនៅក្នុងកម្មវិធី។ ជាធម្មតា MC កាន់ក្រដាសនៅដៃមួយ, ឯដៃមួយទៀតកាន់មេក្រូ។ ចំពោះឈ្មោះអ្នកទទួលមេដាយតែងតែត្រូវបានព្រីនលើក្រដាស A4, បែប portrait ។ តាមរបៀបរបប, MC មិនអាចបត់ក្រដាសដែលកាន់នៅនឹងដៃឡើយ ដែលនេះនាំឲ្យ MC រាងស្មុគស្មាញបន្តិច ព្រោះមិនអាចបត់ក្រដាស ហើយក៏មិនអាចប្រើប៊ិចមកគូសចំណាំ ព្រោះឈ្មោះមួយៗដែលត្រូវហៅឲ្យឡើងវេទិកាមានគម្លាតពីគ្នាត្រឹមពី ១ ទៅ ២ វិនាទីប៉ុណ្ណោះ, ដូច្នេះគ្មានពេលសម្រាប់គូសចំណាំលេខរៀងថាហៅដល់ឈ្មោះណាឡើយ។ ក្នុងករណីនេះលោកអ្នកដែលធ្វើជា MC គួរត្រៀមជាមុន ដោយកាត់ក្រចកមេដៃឲ្យចេញជារាងស្រួច។ ដៃណាកាន់ក្រដាសឈ្មោះ, ត្រូវកាត់ក្រចកមេដៃដៃខាងនោះ។ ដល់ពេលកាន់ក្រដាស គឺតម្រង់ចុងក្រចកទៅរកលេខរៀង។ ចុងក្រចកតម្រង់ទៅរកលេខមួយណា, ត្រូវហៅឈ្មោះមួយនោះ។ បន្ទាប់ពីហៅឈ្មោះនោះរួច ត្រូវចង្អុលចុងក្រចកទៅលេខរៀងបន្ទាប់ភ្លាមតែម្តង។ ធ្វើបែបនេះ ទីមួយ, មិនហៅរំលងឈ្មោះ និងទីពីរ, មិនហៅឈ្មោះពីរដង៕