បែបបទដាក់កាលបរិច្ឆេទលើឯកសាររដ្ឋបាលទូទៅ

ជាទូទៅ ឯកសាររដ្ឋបាលស្ថាប័នរដ្ឋធ្វើលើក្រដាស A4។ ដូច្នេះពេលប្រើពាក្យ «ក្រដាស» សម្រាប់ឯកសាររដ្ឋបាល គឺសំដៅដល់ក្រដាស A4 ទាំងមូលតែម្តង។

តាមបែបបទរដ្ឋបាល, អត្ថបទមិនសរសេរពេញលើក្រដាសទេ។ អត្ថបទត្រូវសរសេរក្នុងប្រអប់មានខ្សែបន្ទាត់រុំព័ទ្ធ ដែលអាចមើលឃើញក្នុងកុំព្យូទ័រ។

ការបែងចែកផ្នែកនៃក្រដាស៖

– ចាប់ពីឈ្មោះនាយកដ្ឋានឡើងទៅ ហៅថា «ផ្នែកខាងលើក្រដាស» ឬ «ផ្នែកខាងលើនៃសន្លឹក»។

– ចាប់ពីខ្សែបន្ទាត់រុំព័ទ្ធដែលស្ថិតនៅក្រោមចុះទៅក្រោម ហៅថា «ផ្នែកខាងក្រោមក្រដាស»។

– ចុងក្រដាសហៅថា ចុងសន្លឹក។

ឯកសាររដ្ឋបាលទូទៅដែលចរាចរក្នុងស្ថាប័នមានដូចជា៖

– របាយការណ៍

– កំណត់ហេតុ

– និងសំណើសុំផ្សេងៗ

ត្រូវផ្តើមដោយពាក្យ «សូមគោរពជូន»។

ចាប់ពីពាក្យ «សូមគោរពជូន» នេះ ជាទូទៅអាចហៅថា «អត្ថបទ» ឬ «អត្ថបទឯកសារ» ហើយអត្ថបទឯកសារចប់នៅត្រឹមឃ្លា៖

សូម……………….. ទទួលនូវការគោរពពី……………។

គ្រប់ឯកសាររដ្ឋបាលត្រូវតែមានកាលបរិច្ឆេទ។ សម្រាប់ឯកសាររដ្ឋបាលទូទៅចរាចរក្នុងស្ថាប័ន ដូចដែលបានរៀបរាប់ខាងលើ ត្រូវដាក់កាលបរិច្ឆេទបន្ទាប់ពីអត្ថបទ។

ដោយឡែក ចំពោះ «លិខិតអញ្ជើញ» បុគ្គល, អង្គភាព ឬស្ថាប័នណាមួយឲ្យមកចូលរួម ដូចជាកម្មវិធីប្រជុំ, កម្មវិធីចុះហត្ថលេខា។ល។ បើសិនជា៖

– ភ្ញៀវមានតំណែងខ្ពស់ជាងស្ថាប័នសាមី, កាលបរិច្ឆេទនឹងត្រូវដាក់នៅខាងក្រោម។

– ភ្ញៀវមានតំណែងទាបជាងស្ថាប័នសាមី, កាលបរិច្ឆេទត្រូវដាក់នៅខាងលើពាក្យ «លិខិតអញ្ជើញ»។

បញ្ជាក់៖ របៀបរបបដាក់កាលបរិច្ឆេទលើលិខិតអញ្ជើញដែលបានរៀបរាប់ក្នុងអត្ថបទនេះ ជាប្រភេទលិខិតអញ្ជើញឲ្យចូលរួមកម្មវិធីទូទៅប៉ុណ្ណោះ។ លិខិតរដ្ឋបាលមានច្រើនប្រភេទ, ដោយប្រភេទខ្លះមានបែបបទដូចគ្នា ខ្លះខុសគ្នា។ បើសិនចង់ដឹងឲ្យអស់ និងចង់ជ្រាបឲ្យច្បាស់ មានតែចូលបម្រើការងារនៅផ្នែកហ្នឹងផ្ទាល់ទើបជាការល្អ៕