ម្ភៃ

ខ្មោចដែលនៅក្នុងបន្ទប់នោះមានច្រើន។ ពួកគេនៅមុនគ្រួសារភីដាទៅដល់។ ខ្លះនៅក្នុងបន្ទប់, ខ្លះចេញដើរលេងនៅក្រៅ តែក្នុងបរិវេណសណ្ឋាគារ។

ពេលគ្រួសារភីដាចូលទៅ ពួកគេចេញមកនៅក្នុងស្រះ, មុខបន្ទប់ផ្សេងៗ និងខ្លះទៅនៅក្នុងបន្ទប់ដែលមនុស្សមិនទាន់មកដេក។

ខ្មោចបួនដែលមានខ្មោចយាយចាស់, ខ្មោចស្រី, ខ្មោចប្រុស និងខ្មោចក្មេងប្រុសជាក្រុមគ្រួសារ។ ពួកគេមកដល់ដំណាលគ្នានឹងភីដា។ ខ្មោចស្រីជាកូនរបស់ខ្មោចយាយចាស់, ខ្មោចប្រុសជាប្តីរបស់ខ្មោចស្រី ហើយខ្មោចក្មេងប្រុសជាកូនរបស់ពួកគេទាំងពីរ។

ខ្មោចដែលភីដាឃើញតាមច្រកតូច, ខ្មោចដែលនៅក្នុងបន្ទប់បើកវាំងនន ឃើញតែប្រឡង់ភ្នែក។ល។ ជាខ្មោចផ្សេង, មិនពាក់ព័ន្ធនឹងគ្រួសារខ្មោចបួនរូបនោះទេ។ ចំណែកក្បាលខ្មោចស្រីហោះ និងខ្មោចប្រុសទប់ទ្វារដែកទើបជាខ្មោចកូន និងកូនប្រសារបស់ខ្មោចយាយចាស់។

រីឯខ្មោចដែលចូលខ្លួនចេងជាខ្មោចប្រុសមួយផ្សេងទៀត។ គេខឹងចេងដែលឲ្យបន្ទប់ទៅគ្រួសារភីដា នាំឲ្យគេត្រូវទៅនៅស្រះទឹក ដូច្នេះទើបគេដើរតាមចេង ហើយចូលខ្លួនចេងដើមី្បជាការសងសឹក។