ជំនួយស្មារតី ជាកំណត់សម្គាល់ ឬកំណត់ចំណាំនូវចំណុច និងរឿងដែលត្រូវលើកនៅក្នុងកិច្ចប្រជុំ។ ជាទូទៅ មានតែថ្នាក់ដឹកនាំប្រើពាក្យ «ជំនួយស្មារតី» នេះ។ ដោយឡែកអ្នកផ្សេងៗច្រើនតែប្រើពាក្យថា 'Note' តាមភាសាអង់គ្លេស ដែលប្រែមកជាភាសាខ្មែរថា «សម្គាល់» ឬ «ចំណាំ» ហ្នឹងឯង។ ថ្វីដ្បិតតែថ្នាក់ដឹកនាំជាអ្នកប្រើជំនួយស្មារតី តែជាធម្មតាគឺខាងជំនួយការឬក្រុមជំនួយការជាអ្នករៀបចំឲ្យ។ មុនពេលប្រជុំ ថ្នាក់ដឹកនាំនឹងហៅជំនួយការទៅជួប រួចប្រាប់ពីអ្វីដែលគាត់ចង់និយាយ។ ជំនួយការនឹងកត់ត្រានូវសម្តីរបស់ថ្នាក់ដឹកនាំ រួចយកមករៀបចំនៅក្នុងកុំព្យូទ័រ។ ជិតដល់ថ្ងៃប្រជុំ ជំនួយការនឹងចូលទៅជួបថ្នាក់ដឹកនាំ ដោយយកសេចក្តីព្រាងជំនួយស្មារតីដែលបាន print រួច ទៅដាក់ជូនដើមី្បពិនិត្យ។ ក្រោយពីអានរួច ថ្នាក់ដឹកនាំនឹងប្រាប់ថា គួរលុបត្រង់នេះ, គួរថែមថយត្រង់នេះ ឬសម្រេចថាយក ដោយមិនបាច់កែ។ ការធ្វើ «ជំនួយស្មារតី» មិនបានទាមទារនូវរបៀបរបបផ្លូវការនោះទេ។ សំខាន់នៅក្នុងក្រដាសត្រូវមានចំណងជើង, កាលបរិច្ឆេទប្រជុំ, ទីកន្លែងប្រជុំ, ប្រធានបទត្រូវប្រជុំ, និងរឿងដែលថ្នាក់ដឹកនាំត្រូវនិយាយ ដោយដាក់ជាចំណុចៗ និងសរសេរសង្ខេបខ្លីៗ។ សារប្រយោជន៍នៃការធ្វើ និងប្រើជំនួយស្មារតី គឺ៖ មិនច្រឡំប្រធានបទកិច្ចប្រជុំ មិនភ្លេចចំណុចសំខាន់ៗដែលត្រូវនិយាយក្នុងកិច្ចប្រជុំ កាត់បន្ថយការនិយាយរឿងក្រៅផ្លូវការ ដែលនាំឲ្យចំណាយពេលប្រជុំឥតប្រយោជន៍៕
Category: General
ដូរទីប្រឹក្សា បើមុខរបរមិនដើរទៅមុខ
បញ្ជាក់៖ អ្វីដែលខ្ញុំបង្ហាញខាងក្រោមនេះ ជាបទពិសោធន៍របស់ខ្ញុំផ្ទាល់។ ពេលខ្ញុំធ្វើ blog, ខ្ញុំបានចូលអានអត្ថបទរបស់ bloggers ផ្សេងៗដែលប្រាប់ពីវិធីធ្វើឲ្យ blog មានអ្នកទស្សនា។ មិនត្រឹមតែអានទេ ខ្ញុំធ្វើតាមទាំងអស់។ ប៉ុន្តែហាក់ដូចជាគ្មានបានផលសោះ។ មិនថាប្រឹងច្រើនឆ្នាំប៉ុណ្ណា ក៏នៅតែគ្មានលទ្ធផល។ ពេលនោះ ខ្ញុំនឹកសង្ស័យថា ខ្ញុំប្រហែលជាដើរមិនត្រូវផ្លូវ។ ខ្ញុំក៏ឈប់អានអត្ថបទទាំងនោះ ហើយប្តូរទៅអានអត្ថបទទាក់ទងនឹងការធ្វើជំនួញវិញ។ ហើយខ្ញុំបានប្រទះនឹងឃ្លាមួយដែលធ្វើឲ្យខ្ញុំភ្ញាក់ខ្លួន៖ ជំនួញ គឺជាការលក់ទំនិញទៅឲ្យអតិថិជន ដែលទំនិញនោះជារបស់ដែលអតិថិជនត្រូវការ។ ការធ្វើ blog ឬគេហទំព័រក៏ជាជំនួញដែរ។ បើចង់ឲ្យមានអ្នកទស្សនា លុះណាតែ blog ឬគេហទំព័ររបស់យើងមានអ្វីដែលអ្នកទស្សនាត្រូវការ។ ដោយសារតែពាក្យមួយឃ្លានេះ ទើបខ្ញុំផ្លាស់ប្តូរគេហទំព័ររបស់ខ្ញុំពីការចេញផ្សាយអត្ថបទទូទៅ និងរឿងប្រឌិត ទៅជាផ្តល់គំរូឯកសាររដ្ឋបាលជាភាសាខ្មែរឲ្យអ្នកទស្សនាមកចម្លងយកទៅប្រើវិញ។ ហើយការផ្លាស់ប្តូរនេះពិតជានាំនូវលទ្ធផលគួរជាទីពេញចិត្តមែន។ វាមិនទាន់ចាត់ទុកថាបានជោគជ័យទេ តែវាជាការចាប់ផ្តើមរកឃើញផ្លូវដែលត្រូវ។ ដូច្នេះបើសិនជាលោកអ្នកមានមុខរបរមិនថាជា blogger ឬជាអ្វីទេ ហើយមុខរបរនោះដូចជាគាំងឬមិនដើរទៅមុខ លោកអ្នកគួរសាកល្បងប្តូរ៖ - អ្នកដែលលោកអ្នកតែងតែទៅរកដើមី្បឲ្យផ្តល់យោបល់ឲ្យលោកអ្នក - ប្រភេទឯកសារដែលលោកអ្នកអាន និង - វិធីសាស្ត្រដែលលោកអ្នកកំពុងប្រើ។ ដូចខ្ញុំបានពោលពីខាងលើ ពេលខ្លះប្រហែលជាយើងរើសមិនត្រូវ ទើបបានជាយើងមិនទទួលបាននូវអ្វីដែលស័ក្តិសមនឹងបាន៕ ** ** … Continue reading ដូរទីប្រឹក្សា បើមុខរបរមិនដើរទៅមុខ
គុណប្រយោជន៍ ២ របស់ដើមគូឆាយ
ប្រជាជនខ្មែរតាមស្រុកស្រែចម្ការនិយមដាំដើមគូឆាយនៅតាមផ្ទះ។ នេះក៏ព្រោះតែដើមនេះមានអត្ថប្រយោជន៍ចំនួនពីរធំៗ៖ ១. អាចយកមកធ្វើជាអាហារ ដូចជាឆាជាមួយស៊ុត, ឆាជាមួយសាច់ជ្រូក, ធ្វើជានំគូឆាយជាដើម។ ២. អាចប្រើជំនួសប្រេងខ្យល់ឬប្រេងកូឡា។ ចំណុចទី ២ ជារបៀបរបបនៅតំបន់ស្រុកស្រែរបស់ខ្មែរយើង។ នៅពេលក្មេងតូចៗឈឺឬចុកឆ្អល់ពោះ គេយកស្លឹកគូឆាយទៅញីនឹងប្រេងកាតឬទឹកឃ្មុំ រួចយកមកលាបលើពោះរបស់ក្មេង។ មិនមែនតែក្មេងទេ ចាស់ក៏ប្រើបានដែរ គ្រាន់តែគេនិយមប្រើលើក្មេងច្រើនជាង។ ទំនៀមនេះមានតាំងពីបុរាណមក។ ដើមគូឆាយពិបាករកណាស់ ព្រោះមិនមែនមានគ្រប់ខេត្តឡើយ ហើយមានតំបន់ខ្លះដាំមិនបានល្អទៀតផង៕ Two benefits of garlic chive Khmer people in rural areas like to plant garlic chives at home because: 1. It can be used to fry with eggs, fried with pork, or it can … Continue reading គុណប្រយោជន៍ ២ របស់ដើមគូឆាយ
តើវិក្កយបត្រ និងបង្កាន់ដៃបង់ប្រាក់ខុសគ្នាឬដូចគ្នា?
វិក្កយបត្រ ជាភាសាអង់គ្លេសហៅថា Invoice។ បង្កាន់ដៃបង់ប្រាក់ ជាភាសាអង់គ្លេសហៅថា Receipt។ ទាំងពីរនេះមានតួនាទីខុសគ្នា។ ឧទាហរណ៍ គ្រឹះស្ថានបោះពុម្ពផ្សាយសៀវភៅ ក មានសៀវភៅ ១០ ចំណងជើង។ អង្គការ ខ បានបញ្ជាទិញសៀវភៅទាំង ១០ ចំណងជើងនោះ ដោយក្នុងមួយចំណងជើងយក ១០ ក្បាល សរុប ១០០ ក្បាល។ នៅពេលបញ្ជូនសៀវភៅទៅដល់ទីតាំងរបស់ ខ, ក ត្រូវយកវិក្កយបត្រ (invoice) ទៅឲ្យ ខ ដើមី្បទូទាត់លុយ។ បន្ទាប់ពីទទួលបានលុយពី ខ ហើយ, ក ត្រូវចេញបង្កាន់ដៃបង់ប្រាក់ (receipt) ទៅឲ្យ ខ ដើមី្បបញ្ជាក់ថាខ្លួនបានទទួលលុយពី ខ ថ្លៃសៀវភៅ ១០០ ក្បាលនេះរួចហើយ។ នេះជាដំណើរការប្រើប្រាស់វិក្កយបត្រ និងបង្កាន់ដៃបង់ប្រាក់។ មិនថាអាជីវករខ្នាតតូច, មធ្យម ឬធំទេ គួរយល់ដឹងពីចំណុចនេះ ព្រោះទីមួយ ដើមី្បជួយដល់ការគ្រប់គ្រងអាជីវកម្ម និងទីពីរ ទាក់ទងនឹងការបង់ពន្ធផងដែរ៕
ស្រមោលព្រះចន្ទ្រ 