គំរូរបាយការណ៍ចូលរួមសិក្ខាសាលា (ផ្ទាល់ខ្លួន)

ខាងក្រោមនេះជាគំរូរបាយការណ៍ដែលខ្ញុំធ្វើផ្ទាល់ខ្លួន និងសម្រាប់ប្រើប្រាស់ផ្ទាល់ខ្លួន។

ខ្ញុំចែករំលែកឲ្យលោកអ្នកសម្រាប់អានជាព័ត៌មានតែប៉ុណ្ណោះ។

**

**

*

របាយការណ៍

ស្តីពី

ការចូលរួមសិក្ខាសាលា «ការរៀបចំបញ្ជីពន្ធដារសម្រាប់សហគ្រាសខ្នាតតូច»

កាលបរិច្ឆេទ៖ ថ្ងៃទី ១៦ ខែកក្កដា ឆ្នាំ ២០២៣

ទីតាំង ៖ អគារវិទ្យាស្ថាន

ម៉ោង ៖ ៨ ព្រឹក ដល់ ១២:០០

រៀបចំដោយ ៖

បង្រៀនដោយ ៖

ចំនួនសិក្ខាកាម ៖ ៥២ នាក់

ខ្លឹមសាររបាយការណ៍៖

លោកគ្រូណែនាំពីខ្លួនគាត់ និងថ្លែងអំណរគុណចំពោះសិក្ខាកាម ដោយបញ្ជាក់ថា ថវិកាដែលបានទទួលពីសិក្ខាកាមនឹងយកទៅជួយដល់កុមារនៅខេត្តព្រះវិហារ។ ចំពោះគោលបំណងរបស់មេរៀន គឺ៖

– ដើមី្បឲ្យអ្នករកស៊ីមុខរបរខ្នាតតូចយល់ដឹងពីពន្ធ

– ដឹង និងចេះរបៀបបង់ពន្ធ និងរៀបចំឯកសារបង់ពន្ធ

បន្ទាប់មក គាត់ឲ្យសិក្ខាកាមទាំងអស់ណែនាំខ្លួន ដោយប្រាប់ឈ្មោះ, មុខរបរ, បញ្ហាមួយដែលបានជួបប្រទះក្នុងមុខរបរ និងមូលហេតុដែលមករៀន។

ក្រោយពីសិក្ខាកាមណែនាំខ្លួនរួចរាល់ គ្រូចាប់ផ្តើមធ្វើបទបង្ហាញ៖

– នៅក្នុងមាតិកាមាន ៣ ជំពូក។ ជំពូកទី ៣ ទើបជាផ្នែកសំខាន់ និងជាអ្វីដែលគាត់បង្កើតសិក្ខាសាលានេះ។

– អំឡុងនោះមានសិក្ខាកាមសួរសំណួរ។ គ្រូបានឆ្លើយ ហើយគាត់ក៏បានបញ្ជាក់ថា អ្វីដែលគាត់លើកឡើងគឺតាមច្បាប់ ទោះជាការផ្តល់យោបល់ឬដំណោះស្រាយក៏ដោយ។ មានសំណួរខ្លះ គ្រូបានតបថា គាត់មិនអាចឆ្លើយបាន ដោយសារតែវាជាបញ្ហាចោទ និងកំពុងតែជជែកពិភាក្សាគ្នានៅឡើយ។

– គ្រូបានបញ្ជាក់ទៀតថា ការចុះឈ្មោះជាអាជីវកម្មខ្នាតតូច (ការប្រកាសពន្ធតូច) គឺស្វ័យប្រវត្តិ មានន័យថា ម្ចាស់អាជីវកម្មគ្រប់រូបត្រូវដឹងថា អាជីវកម្មខ្លួនជាប់ពន្ធអី ហើយចូលទៅប្រកាសពន្ធដោយខ្លួនឯង។ អ្នកដែលជាប់ពន្ធតូច គឺ (មុខរបរ) អ្នកដែលរកចំណូលបានក្នុងមួយឆ្នាំ ចាប់ពី ២៥០ លានរៀល ដល់ ១ ០០០ លានរៀល ឬ ១ ៦០០ លានរៀល ទៅតាមវិស័យអាជីវកម្ម។ ការរាប់បញ្ចូលថាជាអាជីវកម្មខ្នាតតូចមិនមែនដោយសារតែចំណូលប៉ុណ្ណឹងនោះទេ នៅមានការគណនាលើតម្លៃទ្រព្យសកម្មអាជីវកម្មផងដែរ។

– តាមច្បាប់ ក្រោយបើកអាជីវកម្ម ១៥ ថ្ងៃ ម្ចាស់អាជីវកម្មត្រូវទៅចុះឈ្មោះ ដោយផ្អែកលើលក្ខខណ្ឌទាំងប្រាក់ចំណូល, តម្លៃទ្រព្យសកម្ម…។

– ដើមី្បប្រកាសអាជីវកម្មខ្លួនថាជាអាជីវកម្មជាប់ពន្ធតូច និងកំណត់អាជីវកម្មខ្លួនថាជាអាជីវកម្មជាប់ពន្ធតូច ម្ចាស់អាជីវកម្មត្រូវរៀបចំ, មាន និងគ្រប់គ្រងអាជីវកម្ម និងឯកសារអាជីវកម្មរបស់ខ្លួន មានដូចជាការកត់ត្រាចំណាយចំណូល, ការប្រើប្រាស់វិក្កយបត្រ, ការគ្រប់គ្រងស្តុក។ល។

– រាល់ឯកសារ និងវិក្កយបត្រផ្សេងៗត្រូវតែរក្សាទុកយ៉ាងហោចណាស់ ៣ ឆ្នាំ រាប់ចាប់ពីថ្ងៃបើកអាជីវកម្ម។ បើអ្នកជាប់ពន្ធមធ្យម និងពន្ធធំ ត្រូវរក្សាទុក ១០ ឆ្នាំ។

– បញ្ជីសម្រាប់អ្នកជាប់ពន្ធតូច មានបីសំខាន់ គឺបញ្ជីចំណាយ (បញ្ជីទិញប្រចាំថ្ងៃ), បញ្ជីចំណូល (បញ្ជីលកប្រចាំថ្ងៃ), និងបញ្ជីស្តុកទំនិញ (ចំនួនទំនិញទិញចូល, ចំនួនទំនិញលក់ចេញ, និងចំនួនទំនិញនៅសល់ចុងខែឬចុងឆ្នាំ)។

– គ្រូបានបង្ហាញ និងពន្យល់ត្រួសៗពីពន្ធអាករបន្ថែម, ពន្ធអាករពិសេស, ពន្ធអាករបំភ្លឺសាធារណៈ, ពន្ធអាករស្នាក់នៅ, ប្រាក់រំដោះពន្ធ, ពន្ធកាត់ទុក និងរបៀបគណនាពន្ធ។

– បន្ទាប់មក គ្រូផ្តល់វេទិកាដល់គ្រូបង្គោលម្នាក់ទៀតដែលមកបង្ហាញពីរបៀបកត់ត្រាបញ្ជីគណនេយ្យសាមញ្ញ ដែលជាបញ្ជីសម្រាប់អ្នកជាប់ពន្ធតូច៖

១. ម្ចាស់អាជីវកម្មត្រូវកត់ត្រាជាប្រចាំថ្ងៃ។

២. ម្ចាស់អាជីវកម្មត្រូវកត់ត្រាដោយខ្លួនឯង។

៣. គួរយកវិក្កយបត្រពេលទិញទំនិញ និងត្រូវរក្សាទុកវិក្កយបត្រទាំងនោះ។

៤. វិក្កយបត្រលក់ទំនិញមិនមែនចេះតែចេញទេ។

៥. ការកត់ត្រាចំណាយចំណូលមិនមែនចេះតែកត់ទេ។ ត្រូវសិក្សាឲ្យច្បាស់នូវសកម្មភាពចំណូលចំណាយណាចូលក្នុងខ្ទង់ចំណូលចំណាយមួយណា។ ការកត់ត្រាដោយមិនបានច្បាស់លាស់ ជាការដំឡើងពន្ធខ្លួនឯង នាំឲ្យបង់ខាតប្រាក់ខ្លួនឯង ដែលនេះមិនមែនជាកំហុសរបស់ខាងពន្ធដារទេ តែគឺកំហុសម្ចាស់អាជីវកម្មខ្លួនឯង។ ដូច្នេះត្រូវសិក្សាឲ្យបានច្បាស់ និងញែកឲ្យដាច់ ជាពិសេសទ្រព្យផ្ទាល់ខ្លួន និងទ្រព្យអាជីវកម្ម។

– គ្រូបានបង្ហាញពីរបៀបកត់ត្រាទំនិញក្នុងស្តុក ព្រមទាំងបង្ហាញពីទ្រព្យបង់រំលស់ និងបានលើកពីបញ្ហាប្រឈមមួយចំនួនដែលម្ចាស់អាជីវកម្មខ្នាតតូចកំពុងតែជួបប្រទះក្នុងសង្គមជាក់ស្តែង។ គាត់បានផ្តល់យោបល់ពីវិធីដោះស្រាយផ្អែកលើច្បាប់ និងមានបញ្ហាខ្លះទៀតមិនទាន់មានវិធីសាស្ត្រដោះស្រាយនៅឡើយទេ។

មុនពេលបញ្ចប់ គ្រូបានប្រាប់ថា ដោយសារតែការរំពឹងរបស់គាត់ចំពោះសិក្ខាកាមដែលមកចូលរួមយល់ដឹងហើយពីច្បាប់ និងពន្ធ តែជាក់ស្តែងសិក្ខាកាមភាគច្រើនមិនទាន់ដឹងនៅឡើយ ដូច្នេះគាត់បានកែប្រែបទបង្ហាញរបស់គាត់ខ្លះ។ គាត់នឹងផ្ញើបទបង្ហាញឲ្យសិក្ខាកាមតាមក្រុមតេឡេក្រាម។

គ្រូបានបង្ហាញពី app បញ្ជីពន្ធតូច សម្រាប់ឲ្យម្ចាស់អាជីវកម្មខ្នាតតូច ដែលក្រុមការងាររបស់គាត់កំពុងតែធ្វើ។

ជាចុងបញ្ចប់ គ្រូថ្លែងអំណរគុណដល់សិក្ខាកាមដែលបានចំណាយពេលមកចូលរួម និងប្រាប់ឲ្យសិក្ខាកាមឡើងទៅជាន់លើដើមី្បយកលិខិតបញ្ជាក់ការសិក្សាពីវិទ្យាស្ថាន។

បន្ទាប់ពីរៀនចប់ សិក្ខាកាមទាំងឡាយបានឡើងទៅជាន់ខាងលើដើមី្បយកលិខិតបញ្ជាក់ការសិក្សា។ ចំពោះសិក្ខាកាមដែលចុះឈ្មោះក្រោយ ខាងវិទ្យាស្ថានធ្វើលិខិតបញ្ជាក់ការសិក្សាមិនទាន់ ដូច្នេះតម្រូវឲ្យផ្តល់ព័ត៌មានដល់វិទ្យាស្ថាន។ វិទ្យាស្ថាននឹងរៀបចំធ្វើជូន ហើយនឹងជូនដំណឹងឲ្យមកយកលិខិតបញ្ជាក់ការសិក្សានៅពេលក្រោយ៕