បញ្ជាក់៖ នេះជាវិធីសាស្ត្រ និងបទពិសោធផ្ទាល់ខ្លួន។ ក្នុងការបង្កើតមុខរបរអ្វីមួយ, ជំហានដំបូងត្រូវធ្វើឲ្យខ្លួនអ្នកមានគំនិតសិន។ ដើមី្បឲ្យមានគំនិត, អ្នកគួរ៖ - រៀនពីប្រវត្តិសមាជិកគ្រួសារ - ចូលសិក្សានៅសាលា - ធ្វើការយកបទពិសោធដោយផ្ទាល់ ១. រៀនពីប្រវត្តិសមាជិកគ្រួសារ បើសិនជានៅក្នុងគ្រួសាររបស់អ្នកមានសមាជិកដែលជាអ្នកជំនួញ និងជាអ្នកបង្កើតរបរនោះដោយផ្ទាល់ខ្លួនគាត់ មិនមែនបន្តពីឪពុកម្តាយ, នោះជាឱកាសល្អសម្រាប់អ្នក។ សូមសួរគាត់ថាគាត់ចាប់ផ្តើមមុខរបរដំបូងបំផុតដោយវិធីណា។ ក្រោយពីស្តាប់ហើយ, អ្នកប្រាកដជាអាចមានគំនិតថា អ្នកគួរចាប់ផ្តើមធ្វើអ្វីដំបូងគេ ដើមី្បធ្វើឲ្យមុខរបររបស់អ្នកឲ្យចេញជារូបរាង។ ២. ចូលសិក្សានៅសាលា ចំពោះអ្នកដែលគ្មានសមាជិកគ្រួសារជាអ្នកជំនួញ (ឬមានដែរតែជាសាច់ឆ្ងាយ) អ្នកអាចមានជម្រើសចូលរៀនផ្នែកជំនួញ មិនថានៅសាកលវិទ្យាល័យឬវគ្គខ្លីក៏បាន។ ៣. ធ្វើការយកបទពិសោធដោយផ្ទាល់ ប្រសិនបើអ្នកគ្មានចំណុចទាំងពីរខាងលើ ហើយចង់បង្កើតមុខរបរ, វិធីមានតែមួយទេ គឺអ្នកត្រូវតែចូលធ្វើការយកបទពិសោធដោយផ្ទាល់។ ឧទាហរណ៍ អ្នកចង់បើកហាងលក់គ្រឿងទេស, អ្នកគួរចូលធ្វើការនៅហាងលក់គ្រឿងទេស ហើយអំឡុងធ្វើការនោះ អ្នកគួរសិក្សា និងឈ្វេងយល់ពីដំណើរការលក់ដូរទាំងមូលរបស់ហាង និងប្រវត្តិរបស់ម្ចាស់ហាង ជាពិសេសតើគាត់ចាប់ផ្តើមយ៉ាងដូចម្តេច។ ចំណុចនេះសំខាន់ណាស់ ហើយជាទូទៅ គេប្រាប់តែក្រុមគ្រួសារគេប៉ុណ្ណោះ ប៉ុន្តែបើអ្នកបានស៊ើបសួរខ្លះ ទោះមិនដឹងចំណុចស៊ីជម្រៅក៏ដោយ ក៏អាចបានដឹងព័ត៌មានខ្លះៗពីរបៀបគេចាប់ផ្តើម ដែលអាចធ្វើជាទុនសម្រាប់ឲ្យខ្លួនអ្នកមានគំនិតដែរ។ ចំណាំ៖ គន្លឹះសំខាន់មួយដែលមិនអាចខ្វះបានក្នុងការបង្កើតគំនិត នោះគឺមិនថាអ្នកសួរគេផ្ទាល់មាត់ឬសិក្សានៅសាលាក៏ដោយ, អ្នកត្រូវតែកត់ត្រាព័ត៌មានទាំងនោះឲ្យចេញជាអក្សរ៕ … Continue reading ចង់បង្កើតមុខរបរ, តើចាប់ផ្តើមដូចម្តេច?